விண்ணப்பம்

என்னுடைய கனவுகளை
மட்டுமாவது
விட்டுவையுங்கள்
பேரழகூட்டுபவை என்றாலும்
உங்கள் ஒப்பனைகள்
அதற்குத் தேவையில்லை..

என் கனவுகளுக்கு
நிர்வாணம் போதுமானது
அது உங்கள் பளபளக்கும்
ஆடைகளை யாசிக்கவில்லை…

என் கனவுகள் கொஞ்சம்
சவலையானவையாகவே இருந்தாலும்
உங்கள் ஊக்கமருந்துகள்
உங்களிடமே இருக்கட்டும்

என்னுடைய கனவுகளின்
அடிப்படையே கூட
தவறானதாயிருக்கலாம்
தத்துவங்களின் விசாரணைகளிலிருந்து
அதற்கு மட்டும் கொஞ்சம்
விலக்களியுங்கள்

அய்யன்மீர்….

தயைகூர்ந்து புரிந்துகொள்ளுங்கள்…
என்னிடமிருப்பது ஒரேயொரு வாழ்க்கை
என் கனவுகளை மட்டுமாவது
என்னிடம் தாருங்கள்


ஆம்…
கனவுகளை மட்டுமாவது