கேள்வியின் நாயகர்கள்

பேரன்புடையீர்,
சற்றே கருணை வையுங்கள்…
*
ஆயுள் முழுவதும் பேசிக்கொண்டும்
சிரித்துக்கொண்டும் சொல்ல
ஆயிரம் கதைகள் உண்டு
என்னிடம்
*
ஒற்றைக்கோப்பையில்
எச்சில் தேநீரை நாம்
பரஸ்பரம் பகிர்ந்து அருந்துவதில்
யாதொரு தயக்கமும் இல்லை
எனக்கு
*
வலி மிகுந்த உங்கள் துயரங்களை
எனதென எண்ணி மருகும் மனதும்
உங்கள் விழி நீர் துடைக்கும்
கரமும் என்னிடமுண்டு….
*
சொன்னவனை கருதாது
சொற்களைக் கருதும்
பகுத்தறியும் புத்தி
கொஞ்சம் உண்டு.
*
உங்களைப் போலத்தான் நானும்...
அடித்தால் எனக்கும் வலிக்கும்
என்னுடைய அன்பு வீணாகுந்தோறும்
கண்ணீர் சிந்துவேன்
பசித்தால் உண்பதும்
என்னுடலில் கீறினால் ரத்தம் வருவதும்
அப்படியே உங்களைப் போலத்தான்…
*
ஆகவே, தயவுசெய்து
என் முகத்தெதிரே நீட்டாதீர்
உங்கள் ஜாதியை…
.
அப்படியே அருள் கூர்ந்து
நேரடியாகவோ மறைமுகமாகவோ
கேட்காதீர் அந்தக் கேள்வியை….
.
“நீ என்ன ஜாதி ?” எனும்
அந்தக் கேள்வியை…

சாதிகள் இல்லையடி

நாம் கற்றுத்தேரும் மதிப்பெண்களை அடிப்படியாகக் கொண்ட கல்வியால் நல்ல Xerox machineகளை அல்லது நடமாடும் Storage deviceகளை உருவாக்க முடியுமேயன்றி, ஒருபோதும் அறிவுசார் சமூகத்தை உண்டாக்கவே முடியாது என்பதை நான் மனப்பூர்வமாக நம்புகிறேன்.

.

கல்லூரிக்காலங்களில் விடுதியில் கொஞ்சம் நெருங்கிப்பழகிய நண்பர்களுக்கிடையே பொதுப்பிரச்சனையை முன்னிறுத்தி வாக்குவாதங்கள் ஏற்படும். அந்த தனிப்பட்ட உரையாடல்களின் உணர்ச்சிமேலிடும் தருணங்களில், சிலர் வெளிப்படுத்தும் வார்த்தைகளில் பிற ஜாதி / மதத்தினர் மீதான வன்மம் வெளிப்பட்டிருக்கிறது. அத்தருணங்களில் நாங்கள் பேசிக்கொண்டிருக்கும் கல்லூரி மறைந்து, அணிந்திருக்கும் பகட்டான ஆடைகள் மறைந்து, அவர்களின் சுயம் தெரியவந்திருக்கிறது. மெத்தப்படித்திருந்தாலும், நுனி நாக்கு ஆங்கிலம் வசப்பட்டாலும், ஐந்திலக்கத்தில் சம்பளம் வாங்கினாலும் கிட்டத்தட்ட அதே மனநிலையை, இப்போது IT துறையிலும் சில நண்பர்களிடம் பார்க்கிறேன்.
.
“படிக்காம உங்கப்பன் ஆத்தாதான் வீணாப்போய்ட்டாங்க நீயாவது படிச்சு முன்னேறு”


“நல்ல படிங்கடா அப்பத்தான் வாழ்க்கைல முன்னேறலாம்”


போன்ற அறிவுரைகளை நம் பள்ளிக்காலங்களிலும் கல்லூரிக்காலங்களிலும் நிச்சயமாய் கடந்து வந்திருப்போம். அந்த சொற்றொடர்களில் உள்ள முன்னேற்றம் எனும் வார்த்தை வெறுமனே சம்பளத்தையோ அல்லது வயிறு சார்ந்த வாழ்க்கையையோ மட்டும் குறிப்பிடுபவை அல்ல. அவை வாழ்க்கை முறையையும் அறிதலையும் சேர்த்ததுதான்.

.

மனிதர்களை அவர்கள் கருத்தை, உணர்வை சமமாய் பார்க்கும் எளிய உண்மையை கற்றுக்கொடுக்கும் அறிவு, ஆரம்ப பாட சாலைகளில் இருந்து பெரும்புகழ் கொண்ட IIT வரை இல்லையென்பது ஆகப்பெரிய சோகம்….


ஜாதி / மதம் / இனம் மறப்போம்; மனிதம் நினைப்போம்..


நீதி, உயர்ந்த மதி, கல்வி, அன்பு நிறைய உடையவர்கள் மேலோர்…- பாரதி.

மழைத்தண்ணியும் யேசு மேஸ்த்திரியும் - II

”யேசு, அந்த வண்டி இப்ப வராது போலருக்கு; என்ன பண்ணுறது?”

“சரீங்க மொதலாளி அர(அரை)நாள் கூலி மட்டும் கொடுங்க. நாளக்கி இல்லாட்டி நாளனக்கி தண்ணிய புல்ல எடுத்த பிப்(ற்)பாடு வேல செய்யலாம்”

“ஏண்டா புரியாம பேசற? நாளக்கி நாளனக்கின்னெல்லாம் தள்ளிப்போடுற வேல்யே ஆவாது. ஒரே முட்டா வேல நடக்கணும். எவன் உம்மட பின்னாடி அலையறது?”

“தண்ணி ரொம்பி கெடக்குங்க மொதலாளி. அத எடுக்காம வேல செய்ய முடியாதுங்க”

”ஆர்ரா இவன்.. சொன்னதயே மறுக்கா மறுக்கா சொல்லீட்டு...”

மீண்டும் சில நிமிடங்கள் பேச்சு நீண்டது...

“சரீங்க... நாந்தா விவரமில்லாம பேசுறேன்... நீங்களே சொல்லுங்க என்ன பண்ணுறது ?” சலித்தவாறே சொன்னார் யேசு.

இதற்காகவே காத்திருந்ததைப்போல அவர்கள் சொன்னார்கள். இன்றளவும் என்னால் மறக்கமுடியாத, மறக்கவும் கூடாத அந்த வலிமிகுந்த நிகழ்விற்கு அச்சாரம் போடப்பட்டது.

“இதப்பாரு யேசு வேல நடந்தே தீரோணும்; நல்ல பாரு இது மழத்தண்ணி மாறிதான கெடக்கு; அவனயும் இவனயும் புடுச்சு தொங்கறதுக்கு உங்க ஆளுங்களயே உட்டு சுத்தப்படுத்த சொல்லு. உண்டானத கேளு தந்துரலாம்” பீடிகை ஏதுமின்றி துவங்கினார் என் நண்பனின் தாய்.

கொஞ்ச நேரத்துக்கு யேசுவால் பேசவே முடியவில்லை. பின்பு துவங்கினார்.

“ஏனுங்மா... இப்புடி சொல்லுறீங்க. அதெல்லாம் முடியாதுங்க. உள்ளுக்குள்ள இறங்கணும்னு நெனச்சாலே கொமட்டுதுங்க. உங்களுக்கே இது நல்லா இருக்கா?”

“ஏண்டா இப்ப அவ என்ன சொல்லீட்டான்னு இந்த பேச்சு பேசற... அவ சொல்லுறதும் செரிதான. அதுக்கு உண்டாக காச கேளு தந்துடாலம்னு சொல்லுறாள்ள பொறகென்ன?” இணைந்து கொண்டார் நண்பனின் தகப்பனார்.

“மொதலாளி....” இழுத்தார் யேசு.

“என்ரா மொதலாளி கிதலாளின்னுட்டு... நல்லா பரு இது மழத்தண்ணி மாறிதான கெடக்கு” குரல் உயர்த்தினார் நண்பனின் அப்பா.

இந்த சத்தம் கேட்டு வீட்டுக்குள்ளிருந்த நண்பனின் அண்ணனும் இப்போது வெளியே வந்தார். இப்போது நண்பனின் குடும்பமே சேர்ந்துகொண்டு யேசு மேஸ்த்திரியை கட்டாயப்படுத்தினார்கள். மீண்டும் மீண்டும் ”மழத்தண்ணி மாறிதான கெடக்கு... மழத்தண்ணி மாறிதான கெடக்கு” என சொல்லிவைத்தமாதிரி இறங்கச் சொன்னார்கள்.

ஒரு கட்டத்துக்கு மேல் சமாளிக்க முடியாமல் அவர்கள் தொந்தரவும் தாங்காமல், அதுவரை மனதில் அடக்கிவைத்திருந்த அந்தக் கேள்வியை, கொஞ்சம் பணிவுடன் சிரித்துக்கொண்டு கேட்டே விட்டார் யேசு மேஸ்த்திரி.

“சரீங்க மொதலாளி நீங்களே சொன்னாப்புல மழத்தண்ணி மாறிதான கெடக்கு; பேசாம நீங்களே எறங்கிடுங்களேன்”.

ஒரு நிமிடம் அவர் கேட்டதின் அர்த்தம் விளங்காமல் அல்லது அவரால் அப்படி கேட்க முடியுமென்பதை நம்பாமல் அமைதியாகினார் மூவரும்.

“அடி செருப்பால நாயி, என்னடா சொன்ன?” பேச்சு வார்த்தையைத் துவக்கின நண்பனின் தாயே இம்முறை தமிழிலுள்ள அத்தனை கெட்டவார்த்தைகளின் பேச்சையும் துவக்கினார். தொடந்து அவர்கள் மூவரும் யேசுவின் குடும்பத்தையே வசைமாறிப்பொழிந்தனர். அதிலும் மேஸ்த்திரியின் வயதில் பாதிகூட நிரம்பியிராத என் நண்பனின் அண்ணன் அவரை செருப்பாலடிக்கப் பாய்ந்தார்.

இத்தனைக்கும் பொருளாதார ரீதியில் யேசு மேஸ்த்திரி அவர்களுக்கொன்றும் இளைத்தவரில்லை. இரு விரல்களில் மோதிரம், நல்ல தடிமனான மைனர் சங்கிலி, தங்க கெடியாரம் அணிந்து “HERO HONDA CD100” பைக்கில்தான் பவனிவருவார். பின்பு ஊரில் நாலு பெரிய மனிதர்கள் இந்தப்பிரச்சனையைத் தீர்த்து விட்டார்கள். அந்த பிரச்சனை எப்படி தீர்ந்திருக்கும் / தீர்க்கப்பட்டிருக்கும் என என்னால் இப்போது ஊகிக்கமுடிந்தாலும், அப்போது எப்படி தீர்த்தார்களோ என்னவோ...ஆனால், மீண்டும் அந்த கட்டிடத்தை நல்ல முறையில் கட்டித்தந்த தந்ததென்னவோ யேசு மேஸ்த்திரிதான்.

சுட்டாலும் வெண்மை தரும் சங்கு திட்டினால் மட்டும் கோபிக்கவா செய்யும்?

மழைத்தண்ணியும் யேசு மேஸ்த்திரியும் - I

எனக்கு அப்போது ஏறத்தாழ பத்து வயதிருக்கும். என் நண்பனொருவன் வீட்டுக்கு விளையாடச் சென்றிருந்தேன். அவன் வீட்டில் கட்டிட வேலைகள் நடந்து கொண்டிருந்தன. இப்போது சர்வாதிகாரம் புரியும் “வாஸ்து சாஸ்த்திரம்” அப்போது என்ன நிலையிலிருந்ததோ தெரியவில்லை. அவன் வீட்டில் நடந்துகொண்டிருந்த வேலையின் பிண்ணனி இதுதான் “தற்போது கழிவறையும் செப்டிக் டேங்க்கும் உள்ள இடத்தில் ஒரு புதிய அறை அமைப்பது. கழிவறையையும் செப்டிக் டேங்க்கையும் பக்கவாட்டிலுள்ள காலி இடத்தில் புதிதாக கட்டிக்கொள்வது”.

எங்கள் ஊரில் அந்தக் காலகட்டத்தில் கட்டிட வேலைகளில் கலக்கிக்கொண்டிருந்தவர் “யேசு மேஸ்த்திரி”. அது புதிதாக கட்டுவதானாலும், பழைய கட்டிடங்களில் சின்னச் சின்ன மாற்றங்கள் செய்வதானாலும் அனைவரின் முதல் தேர்வு அவராகத்தான் இருந்தார். அவருக்கு முன்னும் சரி பின்னும் சரி அவரளவுக்கு தனிக்காட்டு ராஜாவாக ஜொலித்த மேஸ்த்திரி எவருமில்லை. ஒரே சமயத்தில் எங்கள் ஊரில் கட்டப்பட்டுவந்த ஐந்தாறு கட்டிடங்களுக்கு அவரே மேஸ்த்திரியாக பணியாற்றிய பெருமையும் அவர்க்குண்டு. குடிப்பழக்கம், வேலையில் கொஞ்சம் சுணக்கம் என்றாலும் பொதுவில் நல்ல திறமைசாலி. அவர் தாழ்த்தப்பட்ட வகுப்பில் பிறந்து கிறித்தவராக மாறியிருக்க வேண்டும்.

நண்பனின் வீட்டு கட்டிட வேலைகள் அவர் பொறுப்பில்தான் விடப்பட்டிருந்தது. அன்றைய தினம் கட்டிட வேலைகளை முன்னின்று கவனித்துக் கொண்டிருந்தார் யேசு. நண்பன் வீட்டு கழிவறை முற்றிலுமாக இடிக்கப்பட்டுவிட்டது. அடுத்த வேலை செப்டிக் டேங்க்கை மூடுவது. அதுநாள்வரை உபயோகத்தில் இருந்ததால் செப்டிக் டேங்க்கின் முக்கால் பகுதிவரை தண்ணீர் நிரம்பியிருந்தது. அதை அப்புறப்படுத்தாமல் செப்டிக் டேங்க்கை மூடமுடியாது. இப்போது சென்னை போன்ற நகரங்களில் இருப்பதுபோல் கழிவு நீரெடுக்கும் இயந்திரங்களோ வாகனங்களோ பெருகியிருக்காத காலமது. எங்கள் பேரூராட்சிக்கென இருப்பது ஒரே ஒரு கழிவு நீரெடுக்கும் டிராக்டர். அதுவும் அன்றைய தினம் வரமுடியாத சூழல் (ஒன்று பழுதாயிருக்கும் அல்லது வேறெங்காவது அனுப்பியிருப்பார்கள்). நண்பன் வீட்டாருக்கு வேலையை தொடர்ந்து நடத்தியாக வேண்டும் என்ற எண்ணம். மேஸ்த்திரியை அழைத்து பேசத்துவங்கினர்.