நிழல்முற்றம்

சின்ன வயதில் சினிமா பார்த்த கிராமத்து டெண்ட் கொட்டகைகளின் நினைப்பு மனதில் நீங்காத ஒன்றாகும். படம் துவங்கும் முன்பும், இடைவேளையிலும் விற்கப்படும் திண்பண்டங்களுக்கென தனி ருசி உண்டு. வெளிக்கடைகளில் வாங்கி உண்ணும்போது கிட்டாத தனி ருசிக்கு, திரையரங்கின் மீதான கவர்ச்சியும் ஒரு காரணமாக இருக்கலாம்.

பெருமாள்முருகன் தன் நிழல்முற்றம் நாவலில் அந்த திண்பண்டங்களை விற்பனை செய்யும் சிறுவர்களின் வாழ்க்கையை மிகச்சிறந்த முறையில் பதிவுசெய்துள்ளார்.

ஒவ்வொரு மனிதனின் அன்றாட வாழ்வும் ஏதேனும் ஒரு தற்காலிக இலக்கினை நோக்கியே பயணிக்கின்றன. திரையரங்கில் திண்பண்டம் விற்கும் சிறுவர்களின் வாழ்வின் அத்தகைய பயணத்தில் நம்மையும் இணைத்து அழைத்துச் செல்லும் சிறப்பான நாவல் இது. பொதுவாகவே சிறுவர்கள் தொழிலாளிகளாவது மிகக் கொடுமையானது. அதிலும் கண்காணிக்கவும், கண்டிக்கவும் யாருமேயில்லாமல் தொழிலாளியாகும் சிறார்கள் வெகு சீக்கிரத்தில் ”வளர்ந்து”விடுவார்கள்.

நாமறிந்த மனிதர்கள்தான் என்றபோதும் அவர்களது வாழ்க்கை வேறுபட்டது. என்னதான் உழைத்தாலும் மிக மிக சாதாரணமான எதிர்பார்ப்புகள் கூட பொய்த்துப்போகின்றன. என்றபோதிலும், அன்றாட வாழ்வினை அவர்கள் மகிழ்வுடனே முடிக்கிறார்கள்.

ஒரு திரையரங்கம், கோவில், சந்தைக்கடை, சாப்பாடு, சைக்கிள் ஸ்டேண்டு, பீடி, கஞ்சா, தூக்கம் இப்படி மிகச் சிறிய வட்டத்துக்குள் கதை சுழன்றாலும், சூழ்ந்துள்ள மனிதர்களால் சுவாரசியமடைகின்றது வாழ்க்கை. இவர்கள் நாம் அன்றாட வாழ்வில் அடிக்கடி காணும் மனிதர்கள்தான், ஆனால் நாம் அறிந்திராத இவர்களின் வாழ்வை மிக சிறப்பாக பதிவுசெய்திருக்கிறார் நூலாசிரியர் பெருமாள்முருகன்.

சிறப்பான நாவல்.

நாவல் : நிழல்முற்றம் (நாவல்)
எழுத்தாளர் : பெருமாள்முருகன்
பதிப்பகம் : காலச்சுவடு

சாயாவனம் (நாவல்) – பகிர்தல்

நாகரீகமாகிவிட்ட உலகின், எல்லா மூலைகளிலும் தொழிற்சாலைகள் பெருகிக்கிடக்கின்றன, பயணங்களின் போது பெயர் தெரியாத ஏதேனும் ஒரு கிராமத்தில் தொழிற்சாலை புகைபோக்கிகள் நச்சுப்புகை உமிழ்வதை நாம் கண்டிருக்கலாம். அந்த தொழிற்சாலைகள் எப்போது / எப்படி உண்டாகின ? அதற்கு முன்பு அந்த நிலம் எப்படி இருந்திருக்கும் ? அது நல்ல விளைச்சலைத் தரும் விளைநிலமாகக் கூட இருந்திருக்கலாம்.

எனில், தொழிற்சாலை உண்டானபின் அந்த நிலங்களின் விளைச்சல் முற்றிலுமாய் நின்று போய்விட்டதே... அதை நம்பியிருந்த குடும்பங்களின் கதி என்னவாயிருக்கும் ? நிலத்தை நம்பியிருந்த குடும்பங்களிலாவது மூன்றாம் தலைமுறையினர் எவராவது அந்த தொழிற்சாலையின் கடைநிலை உழியராகும் பேறு பெற்றிருக்கலாம். ஆனால் அந்த நிலத்தின் விளைச்சல் முற்றிலுமாக நின்றுவிட்டதே, அப்படியானால் ஆண்டுதோறும் குறிப்பிட்ட அளவு உணவுப்பொருள் குறைந்திருக்குமே அதை, அந்த நின்றுபோன விளைச்சலை சரி செய்யவழி என்ன?

இப்படியெல்லாம் நாம் சிந்தித்து இருக்கலாம்... மாறாக இவற்றை கண்டும் காணாமலும் இருந்திருக்கலாம். “சா.கந்தசாமி” அவர்கள் எழுதியுள்ள “சாயாவனம்” என்னும் நாவல் ஒரு வனம் அழிக்கப்பட்டு அதில் ஒரு சர்க்கரை ஆலை கட்டப்படும் நிகழ்வை விவரிக்கின்றது.

மூங்கில், தேக்கு, சீமைக்கருவேலம் உள்ளிட்ட மரம் செடிகொடிகள், சிட்டுக்குருவி, காகம், மைனா என பலவகையான பறவையினங்கள் என எல்லாமும் கலந்து நல்லமுறையிலிருந்த ஒரு வனம் மனிதனின் சுய நலத்தை முன்னிட்டு அழிய நேரிடும் அவலத்தை இந்நாவல் மிகச்சிறப்பான முறையில் பதிவுசெய்துள்ளது.

பலநூறு வகையான மரங்கள் அடர்ந்திருந்து, பல வகைகளில் மக்களுக்கு பயன்பட்ட அவ்வனத்தை இளமையின் வேகமும், முதுமையின் அனுபவமும் கூட்டணி அமைத்துக் கொண்டு அழித்துமுடிப்பதும் அதன்பின் ஒரு கட்டத்தில் வனத்தையே நெருப்புவைத்து பொசுக்குவதுமாக அழிவின் கோரமுகங்கள் பதிவுசெய்யப்பட்டுள்ளன. வாரக்கணக்கில் நெருப்பு அந்த வனத்தை உண்டுமுடித்து சாம்பலாகி உமிழ்ந்த காட்சி மிக்க மனவருத்தம் உண்டாக்கியது.

இறுதியாக தொழிற்சாலை உண்டானது. அதுநாள் வரை இலவசமாகவே வனத்திலிருந்து பெற்று வந்த புளியை அவ்வூர் மக்கள் பணம் கொடுத்து வாங்க வேண்டிய நிலைக்கு தள்ளப்படும் நிலையுடன் நாவல் முற்றுப் பெறுகின்றது. மிக மிக தேர்ந்த நடையில் எழுதப்பட்டிருக்கும் இந்நாவல் அவசியம் வாசிக்கப்பட வேண்டிய ஒன்றாகும்.

நாவல் : சாயாவனம் (நாவல்)
எழுத்தாளர் : சா. கந்தசாமி
பதிப்பகம் : காலச்சுவடு (கிளாசிக் வரிசை நாவல்)
பக்கங்கள் : 199
விலை : ரூபாய் 150.00