முகவரி

அனலிலிட்ட பொன்னாய்

உருகியோடும் தார் ஆற்றின்

நடுவிருக்கும்

ஒற்றைச் செருப்பின் முகவரி

தோய்ந்த ரத்தம்…

***

எல்லைகளும் அடையாளமுமற்ற

மிக நீண்ட வான்பரப்பில்,

வழிந்தோடும் காற்றில்

ஒரு பறவையின்

சிறகசைப்பு பதித்துப்போவது

திரும்ப கூடடைவதற்கான

தடம்!

வாஸ்து

மேற்கே கதவு வைக்காதே
கிழக்கே உயரமாக்காதே
வடக்கே பீரோ கூடாது
தெற்கே வாசல் சிறக்காது

இன்னும் இன்னும்
ஆயிரமாயிரம் கட்டளைகள் உண்டு
ஒரு வீடு கட்ட
மட்டுமல்ல
கோவில் கட்டவும்

எத்தனை விதிகள்
அனுதினம் வந்தாலும்
எந்த சாஸ்திரத்தாலும்
கட்டமுடிந்ததேயில்லை
துக்கம் சமீபிக்காத
ஒரேயொரு வீட்டை…