54 கி.மீ / லிட்டர்

கடந்த சனிக்கிழமை (28-11-2009) என்னுடைய வண்டியை சர்வீஸ் செய்ய வேண்டிய கெடு. எனவே பக்கத்திலிருக்கும் ”யமஹா” நிலையத்துக்கு சென்றிருந்தேன்.

நான் சென்றிருந்த நேரம் கூட்டம் மிக குறைவாக இருந்ததால் குறைகளை கேட்க வருபவரிடம் இயல்பாக சிறிது நேரம் பேசிக்கொண்டிருந்தேன். பொதுவான குறைகளை கூறியபடியே வந்தவன் பின்னர் தான் கவனித்தேன் எனக்கு அருகிலேயே என் வண்டியைப் போலவே ஒரு புத்தம் புதிய ”யமஹா க்ளேடியேட்டர்” இருந்தது.

சரி புதிய வண்டியாச்சே மைலேஜ் பத்தி விசாரிக்கலாமென்று அவரிடம் பேசினேன்.

“அண்ணா, இது யாரோட வண்டி ?”

“என்னுது தான் சார்”

“ஓ, அப்படியா? புத்தம் புதுசா இருக்கு..”

“ஆமா சார், கொஞ்ச நாள் முன்னாடி தான் எடுத்தேன்”

“ஓகே ஓகே மைலேஜ் எவ்வளவுண்ணா தருது ?”

சற்றே யோசித்தவர் சொன்னார்...

“அதுக்கின்னா சார், 54 தருது, சூப்பர் என்ஜின், பக்கா பிக்கப், டிஸ்க் பிரேக், ஆட்டோ ஸ்டார்ட் ...... ” என்றேல்லாம் சுமார் 15 நிமிடங்கள் விவரித்தார்.

அதன் பின்னர் சற்று நேரம் பொறுத்து கிளம்பும் முன் மீண்டும் ஒருமுறை அந்த வண்டியை பார்த்தவாறே கிளம்ப எத்தனித்தவன் எதேச்சையாக ஸ்பீடா மீட்டரை பார்த்தேன்.
அதிர்ந்தே போனேன். அந்த வண்டி மொத்தமாகவே 6 கி.மீ தான் ஓடியிருந்தது.

மொத்தமாக 6 கி.மீ மட்டுமே ஓடியிருந்த அந்த வ்ண்டிக்கு அவர் கொடுத்த பில்டப்பை எண்ணி நொந்தவாறே வீடு திரும்பினேன்.